Жасөспірімдер жазда жұмыс істей ала ма?

Жазғы демалыс кезінде қосымша жұмыс іздейтін жасөспірімдер аз емес. Бірі — қалтасын қамдау үшін, енді бірі — ата-анасының сұрауымен жұмысқа тұруға ниетті. Бірақ Еңбек және халықты әлеуметтік қорғау министрлігі кәмелетке толмаған балалардың еңбек қызметі қатаң заңнама шеңберінде ғана жүзеге асуы тиіс екенін ескертеді деп хабарлайды Juzmedia.kz.

? Еңбек кодексінің 69-бабына сәйкес:

• 14–16 жас аралығындағы жасөспірімдер аптасына 24 сағаттан артық жұмыс істей алмайды;

• 16–18 жастағылар үшін бұл шектеу — 36 сағат.

Сонымен қатар, еңбек шарты жасалғанда ата-анасының немесе заңды өкілінің жазбаша келісімі қажет.

⛔ Жасөспірімдерге тыйым салынған жұмыс түрлері:

• түнгі жұмыс (сағат 22:00–06:00),

• үстеме жұмыс,

• вахталық әдіс,

• қосымша жұмыс,

• жұмыс уақытының жиынтық есебімен жүргізілетін еңбек.

«Әрбір бала қанаудан аулақ болу және денсаулығын сақтау үшін өз құқықтарын білуі маңызды. Ал бұл құқықтардың сақталуын қадағалау — ересектердің міндеті. Заңсыз жұмысқа тартқан жұмыс беруші тіпті қылмыстық жауапкершілікке тартылуы мүмкін», – деді ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова.

Егер балалардың заңсыз еңбекке тартылғаны анықталса, бұл туралы:

• еңбек инспекциясына,

• Балалардың құқықтарын қорғау комитетіне,

• немесе 111 байланыс орталығына хабарлауға болады.