Жол ережесін жиі бұзатындарға салынатын айыппұл жеңілдігі алынып тастала ма

Сенат депутаты Марат Қожаев жол ережесін үнемі бұзатындарға салынатын айыппұлдың 50 пайыздық жеңілдігін алып тастауды ұсынды, деп хабарлайды Juzmedia.kz.

БІР ЖҮРГІЗУШІ БІР ЖЫЛДА 143 РЕТ ТӘРТІП БҰЗҒАН

Өткен жылы Алматыда жол ережесін бұзғандар саны 4 миллионнан асқан. Сенатор жүргізушілердің жол қозғалысы ережелерін қасақана елемейтінін, айыппұл арқылы ережені қайта бұзумен күрес мүмкін еместігін айтты.

“Мәселен, бір жүргізуші бір жылда 143 тәртіпбұзушылық жасап, жалпы сомасы 3 млн теңгеден астам айыппұл төлеген. Алдын алу жұмысын күшейту үшін мұндай жүргізушілерді сынақты қайта тапсыруға жіберген, қажет болған жағдайда жүргізуші куәлігінен айырған жөн”, - деп атап өтті депутат.

Кейбір адамдар жеңілдіктерді теріс пайдаланып, айыппұлдарды болмашы шығын ретінде қабылдайды.

“Көліктердің беделді маркалары мен жоғары сұранысқа ие нөмірлеріне қарап, біз әдетте жол қозғалысы ережелерін елемей, қасақана төтенше жағдай туғызатын, жолдарда қауіпті маневр жасайтын және қауіпсіздік талаптарын өрескел елемейтін ауқатты отбасылардың жастары туралы айтып отырмыз”, - деді Марат Қожаев.

СЕНАТОР ҰСЫНЫСТАРЫ ҚАНДАЙ?

Премьер-министрге жолдаған сауалында сенатор мынадай шараларды ұсынды:

• 10 және одан да көп заң бұзған жүргізушілерге жол қозғалысы ережелері бойынша теориялық емтиханды міндетті түрде қайта тапсырту;
• қайталап бұзғаны үшін жазаны күшейту, оның ішінде жүргізуші куәлігін уақытша тоқтата тұру;
• заңбұзушылықтар жиілігін ескере отырып, сараланған жазалау жүйесін әзірлеу;
• жүйелі тәртіп бұзушыларға 50% жеңілдікті толық жою.